DÍA DAS BIBLIOTECAS

Cada 24 de outubro celebramos o Día das Bibliotecas para lembrar a importancia destes lugares máxicos cheos de historias, coñecemento e soños. Esta data escóllese en recordo da destrución da Biblioteca de Sarajevo en 1992, como símbolo de que os libros e a cultura son camiños para a paz e a esperanza. E no noso cole… tamén quixemos festexalo! 🌟

Os nenos e nenas de Infantil, 1º e 2º de Primaria xuntáronse na nosa biblioteca, onde unha gran caixa misteriosa agardaba por eles. Que agochaba aquel enigmático obxecto? Pois nada menos que… as mochilas viaxeiras deste curso! 🎒✨

Unhas mochilas renovadas, con moito agarimo: lucen un parche feito a man e unha fermosa pintura artesanal creada pola nosa artista local, @hilosyballenas .Dentro de cada mochila, os pequenos atoparán unha folliña de “instrucións”, dous libros cheos de aventuras, un álbum de fotos e un novo amigo da pandilla de Risón. 🐾

Estes gatiños viaxeiros acompañarán aos nenos durante unha semana, compartindo risas, lecturas e momentos únicos. As súas historias quedarán gardadas no noso álbum de recordos, un espazo cheo de emocións, lecturas e maxia. 💖

RETO FOTOGRÁFICO DE PORTOBIBLIO!

😺 Este ano, dende PortoBiblio e tendo en conta o proxecto de centro “A vida segreda dos obxectos”, queremos seguir a estela dos nosos compañeiros e compañeiras do @bibliocruceiro e propoñervos un reto fotográfico moi especial🥰 🧐 En que consiste? 

Cada mes propoñeremos un reto no que teredes que facer fotografías orixinais nas que un obxecto ou ser inerte sexa o verdadeiro protagonista. 📬 As fotografías deberán enviarse ao correo electrónico da biblioteca: 👉 orecunchoderison@gmail.com O equipo de biblioteca, formado por mestres e mestras do noso cole, será o xurado encargado de decidir quen é o gañador ou gañadora de cada mes. 🏆 O vencedor ou vencedora recibirá un pequeno recoñecemento polo seu traballo e creatividade. Animádevos a participar e colaborade na creación do noso “Museo de Obxectos”! 

A VIDA SECRETA DOS OBXECTOS

Chega o noso novo podcast, onde contamos todo sobre o Proxecto Documental Integrado: de onde saíu a idea, que queremos conseguir e como o estamos a vivir desde dentro. 

Se queres saber que se agocha detrás do proxecto e escoitar as nosas voces, dálle ao play e acompáñanos nesta aventura. 🚀

FAI CLIC

🪑NOVO PROXECTO DE CENTRO😸 

O pasado mércores no noso centro tivemos a oportunidade de vivir unha experiencia única... A PRIMEIRA FOLGA DE CADEIRAS!!! Ao principio todo parecía un soño... O cole toleu! E nada parecía ter sentido... Pero diso nada... Sabemos que sen emoción non hai aprendizaxe!! E resulta que tan só era a ACTIVIDADE INICIAL do novo proxecto de centro: "A VIDA SEGREDA DOS OBXECTOS". 

Sisi, o que vos contamos!!! Este ano para solucionar esta manifestación, todas e todos comprometémonos a dúas misións: 

1. Coidar de todo o material que nos acompaña día a día. 
2. Investigar os segredos que gardan os nosos obxectos... Porque serán inanimados, pero eles tamén teñen unha historia, función e moitas cousas que contarnos... 

E aquí estamos nós para darlle voz e quen sabe se vida!! Aventura comezada!! 

OBRADOIROS BIBLIO CREATIVA

🌟 Comezamos o curso con moita enerxía! Chegan os obradoiros do primeiro trimestre 🎨📚
Todos os venres do mes estarán cheos de ideas, ilusións e, por suposto… obradoiros para todos os gustos! Se ti tamén pensas que aprender pode ser divertido, este é o teu momento. Anímate e apúntate na biblio!!!

PORTOBIBLIO ABRE AS SÚAS PORTAS

🚪 📚Hoxe inauguramos tempada na nosa biblioteca! O noso anfitrión, 🐱 o noso gatiño Risón, recibiunos con globos 🎈 porque é un día moi especial: a súa casa volve encherse de visitas, risas e libros abertos. 

📖 Recordade que o noso horario de tarde é: 🕓 Luns, mércores e xoves de 16:00 a 18:00 horas.

 👧🧒 Agardámosvos con moita ilusión!